Deomp dezhi !

Div gontadenn japanad all a vo kontet deoc'h hiziv : hini ar Roñfl Ruz da zigentañ, ha goude-se istor Urashima Taro. Hag e fin an abadenn 'vo desket deoc'h skrivañ japaneg !

Cheñchomp bro ha deomp da Vro-Japon ! Ur goñchenn hon eus da gontañ deoc'h, ur gontadenn japanad mod-kozh : Hanasaka Jiisan pe c'hoazh "Istor ar paotr kozh a lakae ar gwez marv da fleurisañ en-dro".

Pell zo n'eus ket bet savet un abadenn nevez avat ! Deuet omp en-dro gant kontadennoù nevez, kontadennoù maori, deus Zelañd-Nevez ma karit : kontadenn ar c'hiwi hag istorioù Maui.

Jazon ha Médée a zo deuet a-benn da laerezh ar vaoutken-aour ! Met dav eo d'an Argonoted dont da Iolkos en-dro bremañ. Met savet eo an avel 'kreiz-tout, hag ur barr-amzer a zo 'tont.

Ar Roue Eetes ne faot ket dezhañ reiñ ar maoutken-aour da Jazon diouzhtu. Dav eo dezhañ ober un dra bennak evitañ a-raok : mont da zoñvaat an daou daro arem, labourat parkeier an Doue Ares ganto, hadañ dent-dragon en irvi ha neuze en em gannañ gant ar soudarded a gellido goude. Dre voneur eo bet sikouret Jazon gant Mede, merc'h ar Roue. Met un den faos eo he zad ...

Jazon hag e gamaraded, an Argonoted, 'zo aet kuit deus Iolkos da vont d'ar C'holdid, bro ar maoutken-aour. Met da zigentañ eo dav dezho paseal dre ar C'herreg Glas : div garreg vras a vir deus ar bagoù da vont pelloc'h. Penaos ober ?

Ur goñchenn all a vo kontet deoc'h hiziv c'hoazh ! Ur istor kozh-tre, un istor a zo bet savet tri c'hant bloavezh a-raok Jesus gant Apollonios Rodos : Jazon hag an Argonoted !

Salud deoc'h bugale ! Hiziv 'vo kontet deoc'h div gontadenn vrav evit Nedeleg ! Da zigentañ 'vo Nedeleg Moutig, savet diwar levr Yann-Bêr Kemener hag Anna Magron, ha goude-se neuze 'vo Les P'tits Renards s'envolent pour Noël ! gant Sillousoune ha Claire Bajen-Castells, ha lakaet e brezhoneg ganeomp. Hag e fin an abadenn c'hoazh 'vo telefonet d'an Tad-kozh Nedeleg !

Tunvezh ha Benjamin a zo bet en Alpoù n'eus ket pell ! Hag ur bern traoù o deus da zeskiñ deoc'h neuze : petra eo an erc'h, petra eo un diruilhad-erc'h (un avalañch ma karit) pe c'hoazh 'blam da betra zo e'mm da « fartañ » ar skioù ! Plijadur 'vo war an heñchoù-ski !

Tunvezh ha Benjamin a zo bet o veajiñ e Afrika evit ar vakañchoù ! Hag an daou-mañ 'neus desket kontadennoù du-hont ! Ha kontant int da gontan teir deuzouto deoc'h hiziv ! Digentañ neuze 'vo "Lostoù al loened" gant Benjamin, goude-se 'vo "Mariko ar Chaseour" gant Tunvezh, hag evit achuiñ 'teuio Benjamin en-dro adarre evit "Ar Roue hag ar C'heginer" !